Cantémus Dómino: glorióse enim magnificátus est.

Fortitúdo mea et laus mea Dóminus,

et factus est mihi in salútem, allelúia.

Deus, cuius grátia iusti ex ímpiis

et beáti effícimur ex míseris,

adésto opéribus tuis, adésto munéribus,

ut quibus inest fídei iustificátio

non desit perseverántiæ fortitúdo.

Per Dóminum.

Deus, qui nos, per huius sacrifícii veneránda commércia,

uníus summæque divinitátis partícipes effecísti,

præsta, quæsumus, ut, sicut tuam cognóvimus veritátem,

sic eam dignis móribus assequámur.

Per Christum.

Pro ómnibus mórtuus est Christus,

ut et qui vivunt iam non sibi vivant,

sed ei qui pro ipsis mórtuus est et resurréxit, allelúia.

Pópulo tuo, quæsumus, Dómine, adésto propítius,

et, quem mystériis cæléstibus imbuísti,

fac ad novitátem vitæ de vetustáte transíre.

Per Christum.