Ego sum primus et novíssimus;

et vivus et fui mórtuus,

et ecce sum vivens in sæcula sæculórum, allelúia.

Præsta, quæsumus, omnípotens et miséricors Deus,

ut Spíritus Sanctus advéniens

templum nos glóriæ suæ dignánter inhabitándo perfíciat.

Per Dóminum.

Súscipe, Dómine, fidélium preces

cum oblatiónibus hostiárum,

ut, per hæc piæ devotiónis offícia,

ad cæléstem glóriam transeámus.

Per Christum.

Spíritus Sanctus, quem mittet Pater in nómine meo,

ille vos docébit ómnia, et súggeret vobis ómnia

quæcúmque díxero vobis, dicit Dóminus, allelúia.

Súmpsimus, Dómine, sacri dona mystérii,

humíliter deprecántes,

ut, quæ in sui commemoratiónem

nos Fílius tuus fácere præcépit,

in nostræ profíciant caritátis augméntum.

Per Christum.