Audívit Dóminus, et misértus est mihi,

Dóminus factus est adiútor meus.

Inchoáta pæniténtiæ ópera, quæsumus, Dómine,

benígno favóre proséquere,

ut observántiam, quam corporáliter exercémus,

méntibus étiam valeámus implére sincéris.

Per Dóminum.

Sacrifícium, Dómine, observántiæ quadragesimális offérimus,

quod tibi, quæsumus, mentes nostras reddat accéptas,

et continéntiæ promptióris nobis tríbuat facultátem.

Per Christum.

Vias tuas, Dómine, demónstra nobis,

et sémitas tuas édoce nos.

Quæsumus, omnípotens Deus,

ut, huius participatióne mystérii

a delíctis ómnibus expiáti,

remédiis tuæ pietátis aptémur.

Per Christum.

De magnálibus tuis, Deus miséricors,

grátias iúgiter réferat plebs tua,

et observatiónes antíquas peregrína recenséndo

ad perpétuam tui visiónem perveníre mereátur.

Per Christum.