Die 12 decembris
Beatæ Mariæ Virginis de Guadalupe
Memoria ad libitum
Lectiones de feria currente:
Tempus Adventus:
Vel lectiones de memoria:
Léctio libri Zacharíæ prophétæ 2, 14-17
vel
« Iubila et lætare, filia Sion, quia ecce ego venio et habitabo in medio tui, ait Dominus. Et applicabuntur gentes multæ ad Dominum in die illa et erunt ei in populum. Et habitabo in medio tui, et scies quia Dominus exercituum misit me ad te.
Et possidebit Dominus Iudam partem suam super terram sanctam et eliget adhuc Ierusalem. Sileat omnis caro a facie Domini, quia consurrexit de habitaculo sancto suo ».
vel:
Léctio libri Apocalýpsis beáti Ioánnis apóstoli 11, 19a ; 12, 1-6a.10ab
Apertum est templum Dei in cælo, et visa est arca testamenti eius in templo eius. Et signum magnum apparuit in cælo: mulier amicta sole, et luna sub pedibus eius, et super caput eius corona stellarum duodecim; et in utero habens, et clamat parturiens et cruciatur, ut pariat.
Et visum est aliud signum in cælo: et ecce draco rufus magnus, habens capita septem et cornua decem, et super capita sua septem diademata; et cauda eius trahit tertiam partem stellarum cæli et misit eas in terram. Et draco stetit ante mulierem, quæ erat paritura, ut, cum peperisset, filium eius devoraret.
Et peperit filium, masculum, qui recturus est omnes gentes in virga ferrea; et raptus est filius eius ad Deum et ad thronum eius. Et mulier fugit in desertum, ubi habet locum paratum a Deo, ut ibi pascant illam diebus mille ducentis sexaginta.
Et audivi vocem magnam in cælo dicentem: « Nunc facta est salus et virtus et regnum Dei nostri et potestas Christi eius ».
Psalmus responsorius : Liber Iudith 13, 18bcde, 19
R/ Tu laus magna géneris nostri.
Benedicta tu es, filia, a Deo excelso
præ omnibus mulieribus, quæ sunt super terram.
Et benedictus Dominus Deus noster, qui creavit cælum et terram.
Quoniam non discedet laus tua
a corde hominum memorantium virtutis Dei
usque in sempiternum.
Allelúia
Felix es, sacra Virgo María, et omni laude digníssima; quia ex te ortus est sol iustítiæ, Christus Deus noster.
Léctio sancti Evangélii secúndum Lucam 1, 26-38
vel
In illo tempore:
Missus est angelus Gabriel a Deo in civitatem Galilææ, cui nomen Nazareth, ad virginem desponsatam viro, cui nomen erat Ioseph de domo David, et nomen virginis Maria.
Et ingressus ad eam dixit: « Ave, gratia plena, Dominus tecum ». Ipsa autem turbata est in sermone eius et cogitabat qualis esset ista salutatio.
Et ait angelus ei: « Ne timeas, Maria; invenisti enim gratiam apud Deum. Et ecce concipies in utero et paries filium et vocabis nomen eius Iesum. Hic erit magnus et Filius Altissimi vocabitur, et dabit illi Dominus Deus sedem David patris eius, et regnabit super domum Iacob in æternum, et regni eius non erit finis ».
Dixit autem Maria ad angelum: « Quomodo fiet istud, quoniam virum non cognosco? ».
Et respondens angelus dixit ei: « Spiritus Sanctus superveniet in te, et virtus Altissimi obumbrabit tibi: ideoque et quod nascetur sanctum, vocabitur Filius Dei. Et ecce Elisabeth cognata tua et ipsa concepit filium in senecta sua, et hic mensis est sextus illi, quæ vocatur sterilis, quia non erit impossibile apud Deum omne verbum ».
Dixit autem Maria: « Ecce ancilla Domini; fiat mihi secundum verbum tuum ». Et discessit ab illa angelus.
vel:
Léctio sancti Evangélii secúndum Lucam 1, 39-47
FRA
Exsurgens Maria in diebus illis abiit in montana cum festinatione in civitatem Iudæ et intravit in domum Zachariæ et salutavit Elisabeth.
Et factum est, ut audivit salutationem Mariæ Elisabeth, exsultavit infans in utero eius, et repleta est Spiritu Sancto Elisabeth et exclamavit voce magna et dixit: « Benedicta tu inter mulieres, et benedictus fructus ventris tui. Et unde hoc mihi, ut veniat mater Domini mei ad me? Ecce enim ut facta est vox salutationis tuæ in auribus meis, exsultavit in gaudio infans in utero meo.
Et beata, quæ credidit, quoniam perficientur ea, quæ dicta sunt ei a Domino ».
Et ait Maria: « Magnificat anima mea Dominum, et exsultavit spiritus meus in Deo salvatore meo ».