Oratio Sancti Caietani
FRARespice, Domine, Sancte Pater, de sanctuario tuo et de excelso cælorum habitaculo, et vide hanc sacrosanctam Hostiam, quam tibi offert magnus Pontifex noster, sanctus puer tuus Dominus Iesus pro peccatis fratrum suorum; et esto placabilis super multitudinem malitiæ nostræ. Ecce, vox sanguinis fratris nostri Iesu clamat ad te de Cruce. Exaudi, Domine: placare, Domine: attende et fac ne moreris propter temetipsum, Deus meus, qui nomen tuum invocatum est super civitatem istam et super populum tuum; et fac nobiscum secundum misericordiam tuam. Amen.
Ut civitatem istam defendere, pacificare, custodire, conservare et benedicere digneris: Te rogamus, audi nos.
Commendatio sacrificii celebrati
Omnípotens, sempitérne Deus, O Conservátor animárum mundique Redémptor, me fámulum tuum ante maiestátem tuam prostrátum benigníssime réspice, et sacrifícium, quod in honórem nóminis tui pro salúte fidélium tam vivórum quam étiam defunctórum, et pro peccátis et offensiónibus meis óbtuli, piíssime réspice, iram tuam a me rémove, grátiam et misericórdiam mihi concéde, iánuam paradísi mihi pande, ab ómnibus malis me poténter éripe, et, quidquid próprio commísi reátu, cleménter indúlge. Et sic in hoc sæculo in præcéptis tuis fac me perseveráre, ut dignus electórum gregi copulári effíciar, te præstánte, Deus meus, cuius nomen benedíctum, honor atque regnum pérmanet in sæcula sæculórum. Amen.
Oratio ad B. Mariam Virginem
O sereníssima Virgo et Mater Dómini nostri Iesu Christi, quæ in tuo sacratíssimo útero portáre meruísti ipsum rerum ómnium Creatórem, cuius sacratíssimum Corpus et Sánguinem recépi, apud ipsum pro me intercédere dignéris, ut quidquid per ignorántiam, neglegéntiam, irreverentiámque in hoc ineffábili Sacraménto omísi vel commísi, idem diléctus Filius tuus, sanctíssimis tuis précibus exorátus, condonáre dignétur. Amen.
Oratio ad omnes Sanctos
Sancti Dei omnes, qui in carne vivéntes, sic Dómino servístis, ut iam cum ipso sine fine regnétis, adéste mihi, quæso, précibus meritísque vestris, ut panis ille cæléstis, et viáticum divínum, quod modo sumpsi, mihi contra omnes infirmitátes, perícula et insídias præstet robur et tutámen; ut in fortitúdine cibi illius ámbulem per huius mundi desértum usque ad montem Dei, et ibídem dulcíssima illius fruitióne vobíscum iúgiter gáudeam, et eum una vobíscum laudem per ómnia saécula. Amen.
E Doctrina Apostolorum
Sic grátias ágite: Gratias tibi agimus, Pater sancte, pro sancto nomine tuo, quod fecisti ut habitet in cordibus nostris, et pro scientia et fide et immortalitate, quam indicasti nobis per Iesum puerum tuum; gloria tibi in sæcula.
Tu, Domine omnipotens, creasti omnia propter nomen tuum, et cibum potumque dedisti hominibus ad fruendum, ut tibi gratias agant, nobis autem largitus es spiritualem cibum et potum et vitam æternam per puerum tuum.
Ante omnia gratias tibi agimus, quod potens es; gloria tibi in sæcula.
Recordare, Domine, Ecclesiæ tuæ, ut eam liberes ab omni malo eamque perficias in caritate tua, et collige eam a quattuor ventis sanctificatam in regnum tuum, quod ei parasti, quoniam tua est virtus et gloria in sæcula.
Adveniat gratia et prætereat mundus hic. Hosanna filio David. Si quis sanctus est, accedat; si quis non est, pænitentiam agat. Maranatha. Amen.
Pláceat tibi, sancta Trinitas, obséquium servitútis meæ: et præsta; ut sacrificium, quod óculis tuæ maiestátis indígnus óbtuli, tibi sit acceptábile, mihíque et ómnibus, pro quibus illud óbtuli, sit, te miseránte, propitiábile. Per Christum Dóminum nostrum. Amen.
Corpus tuum, Dómine, quod sumpsi, et Sanguis, quem potávi, adhæreat viscéribus meis: et præsta; ut in me non remáneat scélerum mácula, quem pura et sancta refecérunt sacraménta: Qui vivis et regnas in sáecula sæculórum. Amen.
Ad vitam sancte ducendam
Iesu dilectissime, qui ex singulári benevoléntia me præ millénis homínibus ad tui sequélam et ad eximiam christiani dignitátem vocásti, largire mihi, precor, opem tuam divínam ad offícia mea rite obeúnda. Oro te, Dómine Iesu, ut resúscites hódie et semper in me grátiam tuam, quæ fuit in me per baptismalem aquam. O potentíssime animárum médice, sana me táliter, ne revólvar in vitia; et cuncta peccáta fúgiam tibique usque ad mortem placére possim. Amen.
O Sacratíssima
O Sacratíssima, o sereníssima et ínclyta, gloriósa Virgo María, quæ Creatórem ómnium creaturárum in tuo sacratíssimo útero fuísti digna portáre, sólaque virgíneo úbere lactáre: cuius veracíssimum sacrúmque Corpus et Sánguinem ego indígnus peccátor modo súmere præsúmpsi: tuam humíliter déprecor misericórdiam, ut apud ipsum pro me peccatóre intercédere dignéris; ut, quidquid in hoc tam ineffábili ac digníssimo sacrifício per me indígnum ignoránter vel negligénter aut accidentáliter seu irreverénter, scílicet in tractándo et suméndo ac ministrándo, actum est, commíssum vel omíssum, tuis sacratíssimis précibus indulgére dignétur idem Dóminus noster Iesus Christus Fílius tuus, qui cum Patre et Spíritu Sancto vivit et regnat in sǽcula sæculórum. Amen.
AD DEUM UNUM ET TRINUM
Quædam invocationes breviores
Per signum crucis
Symbola fidei
Orationes laudis et gratiarum actionis
Actus virtutum theologalium et contritionis
Orationes variæ
Per signum Crucis de inimícis nostris líbera nos, Deus noster. In nómine Patris, et Fílii, et Spíritus Sancti. Amen.
Glória Patri, et Fílio, et Spirítui Sancto. Sicut erat in princípio, et nunc, et semper, et in sæcula sæculórum. Amen.
Invocatio Sanctissimæ Trinitatis
Omnipotentia Patris, adiuva fragilitatem meam et e profundo miseriæ eripe me.
Sapientia Filii, dirige cogitationes, verba et actiones meas omnes.
Amor Spiritus Sancti, esto cunctarum animæ meæ operationum principium, quo iugiter sint divino beneplacito conformes. Amen.
Fiat, laudétur atque in ætérnum superexaltétur iustíssima, altíssima et amabilíssima volúntas Dei in ómnibus.
Deus meus et ómnia.
Doce me, Dómine, fácere voluntátem tuam, quia Deus meus es Tu (Ps. 142, 10)
Benedicta sit sancta Trinitas.
Domine, salva nos, perimus! (Mt. 8, 25)
O Sanctissima Trinitas
FRAO Sanctissima Trinitas, adoro te habitatem per gratiam tuant in anima mea.
O sanctissima Trinitas, habitans per gratiam tuam in anima mea, fac ut magie ac magis amem te.
O sanctissima Trinitas habitans per gratiam tuam in anima mea magis magisque sanctifica me.
Mane mecum, Domine, sis verum meum gaudium.
Symbola fidei
Credo in unum Deum, Patrem omnipoténtem, factórem cæli et terræ, visibílium ómnium et invisibílium. Et in unum Dóminum Iesum Christum, Fílium Dei Unigénitum, et ex Patre natum ante ómnia sæcula. Deum de Deo, lumen de lúmine, Deum verum de Deo vero, génitum, non factum, consubstantiálem Patri: per quem ómnia facta sunt. Qui propter nos hómines et propter nostram salútem descéndit de cælis.
Ad verba quæ sequuntur, usque ad factus est, omnes se inclinant.
Et incarnátus est de Spíritu Sancto ex María Vírgine, et homo factus est. Crucifíxus étiam pro nobis sub Póntio Piláto; passus et sepúltus est, et resurréxit tértia die, secúndum Scriptúras, et ascéndit in cælum, sedet ad déxteram Patris. Et íterum ventúrus est cum glória, iudicáre vivos et mórtuos, cuius regni non erit finis. Et in Spíritum Sanctum, Dóminum et vivificántem: qui ex Patre Filióque procédit. Qui cum Patre et Fílio simul adorátur et conglorificátur: qui locútus est per prophétas. Et unam, sanctam, cathólicam et apostólicam Ecclésiam. Confíteor unum baptísma in remissiónem peccatórum. Et exspécto resurrectiónem mortuórum, et vitam ventúri sæculi. Amen.
Credo in unum Deum, Patrem omnipoténtem, Creatórem cæli et terræ, et in Iesum Christum, Fílium eius únicum, Dóminum nostrum,
Ad verba quæ sequuntur, usque ad María Vírgine, omnes se inclinant.
qui concéptus est de Spíritu Sancto, natus ex María Vírgine, passus sub Póntio Piláto, crucifíxus, mórtuus, et sepúltus, descéndit ad ínferos, tértia die resurréxit a mórtuis, ascéndit ad cælos, sedet ad déxteram Dei Patris omnipoténtis, inde ventúrus est iudicáre vivos et mórtuos. Credo in Spíritum Sanctum, sanctam Ecclésiam cathólicam, sanctórum communiónem, remissónem peccatórum, carnis resurrectiónem, vitam ætérnam. Amen.
Symbolum Athanasianum
FRAAnt. Glória tibi, Trínitas æquális, una Déitas, et ante ómnia sæcula, et nunc, et in perpétuum. (T. P. Allelúia).
1. Quicúmque vult salvus esse,* ante ómnia opus est, ut téneat cathólicam fidem:
2. Quam nisi quisque integram inviolatamque servaverit, * absque dúbio in ætérnum períbit.
3. Fides autem cathólica hæc est: * ut unum Deum in Trinitáte, et Trinitátem in unitáte venerémur.
4. Neque confundéntes persónas, * neque substántiam separántes.
5. Alia est enim persóna Patris, ália Fílii, * ália Spíritus Sancti.
6. Sed Patris, et Fílii, et Spíritus Sancti una est divínitas, * æquális glória, coætérna maiéstas.
7. Qualis Pater, talis Fílius, * talis Spíritus Sanctus.
8. Increátus Pater, increátus Fílius, * increátus Spíritus Sanctus.
9. Imménsus Pater, imménsus Fílius, * imménsus Spíritus Sanctus.
10. Ætérnus Pater, ætérnus Fílius, * ætérnus Spíritus Sanctus.
11. Et tamen non tres ætérni, * sed unus ætérnus.
12. Sicut non tres increáti, nec tres imménsi, * sed unus increátus et unus imménsus.
13. Simíliter omnípotens Pater, omnípotens Fílius, * omnípotens Spíritus Sanctus.
14. Et tamen non tres omnipoténtes, * sed unus omnípotens.
15. Ita Deus Pater, Deus Fílius, * Deus Spíritus Sanctus.
16. Et tamen non tres Dii, * sed unus est Deus.
17. Ita Dóminus Pater, Dóminus Fílius, * Dóminus Spíritus Sanctus.
18. Et tamen non tres Dómini: * sed unus est Dóminus.
19. Quia, sicut singillatim unamquamque persónam Deum ac Dóminum confitéri christiána veritáte compéllimur: * ita tres Deos aut Dóminos dícere cathólica religióne prohibémur.
20. Pater a nullo est factus: * nec creátus, nec génitus.
21. Fílius a Patre solo est: * non factus, nec creátus, sed génitus.
22. Spíritus Sanctus a Patre et Fílio: * non factus, nec creátus, nec génitus, sed procédens.
23. Unus ergo Pater, non tres Patres: unus Fílius, non tres Fílii: * unus Spíritus Sanctus, non tres Spíritus Sancti.
24. Et in hac Trinitáte nihil prius aut postérius, nihil maius aut minus: * sed totæ tres persónæ coætérnæ sibi sunt et coæquáles.
25. Ita ut per ómnia, sicut iam supra dictum est, * et únitas in Trinitáte, et Trínitas in unitáte veneránda sit.
26. Qui vult ergo salvus esse, * ita de Trinitáte séntiat.
27. Sed necessárium est ad Ætérnam salútem, * ut Incarnatiónem quoque Dómini nostri Iesu Christi fidéliter credat.
28. Est ergo fides recta ut credámus et confiteámur, * quia Dóminus noster Iesus Christus, Dei Fílius, Deus et homo est.
29. Deus est ex substántia Patris ante sæcula génitus: * et homo est ex substántia matris in sæculo natus.
30. Perféctus Deus, perféctus homo: * ex ánima rationáli et humána carne subsístens.
31. Æquális Patri secúndum divinitátem: * minor Patre secúndum humanitátem.
32. Qui, licet Deus sit et homo, * non duo tamen, sed unus est Christus.
33. Unus autem non conversióne divinitátis in carnem: * sed assumptióne humanitátis in Deum.
34. Unus omníno, non confusióne substántiæ: * sed unitáte persónæ.
35. Nam sicut ánima rationális et caro unus est homo: * ita Deus et homo unus est Christus.
36. Qui passus est pro salúte nostra: descéndit ad ínferos: * tértia die resurréxit a mórtuis.
37. Ascéndit ad cælos, sedet ad déxteram Dei Patris omnipoténtis: * inde ventúrus est iudicáre vivos et mórtuos.
38. Ad cuius advéntum omnes hómines resúrgere habent cum corpóribus suis: * et redditúri sunt de factis própriis ratiónem.
39. Et qui bona egérunt, ibunt in vitam ætérnam: * qui vero mala, in ignem æternum.
40. Hæc est fides cathólica, * quam nisi quisque fidéliter firmitérque credíderit, salvus esse non póterit.
Glória Patri, et Fílio, et Spirítui Sancto.
Sicut erat in princípio, et nunc, et semper, et in sæcula sæculórum. Amen.
Ant. Glória tibi, Trínitas æquális, una Déitas, et ante ómnia sæcula, et nunc, et in perpétuum. (T. P. Allelúia).
V/. Dómine, exáudi orationem meam.
R/. Et clamor meus ad te véniat.
Sacerdotes addunt:
V/. Dóminus vobíscum.
R/. Et cum spíritu tuo.
Oremus: Omnípotens sempitérne Deus, qui dedísti fámulis tuis, in confessióne veræ fídei, ætérnæ Trinitátis glóriam agnóscere, et in poténtia maiestátis adoráre unitátem: quæsumus; ut, eiúsdem fídei firmitáte, ab ómnibus semper muniámur advérsis. Per Dóminum nóstrum Iesum Chrístum Fílium tuum: qui tecum vivit et regnat in unitáte Spíritus Sancti Deus, per ómnia sæcula sæculórum.
R/. Amen.
Gratias tibi, dulcedo mea et honor meus et fiducia mea, Deus meus, gratias tibi de donis tuis; sed tu mihi ea serva. Ita enim servabis me, et augebuntur et perficientur quæ dedisti mihi, et ero ipse tecum, quia et ut sim tu dedisti mihi.
Agimus tibi grátias, omnípotens Deus, pro univérsis benefíciis tuis: Qui vivis et regnas in sæcula sæculórum. R. Amen.
Te Deum laudámus: * te Dóminum confitémur.
Te ætérnum Patrem, * omnis terra venerátur.
Tibi omnes ángeli, * tibi cæli, et univérsæ potestátes.
Tibi Chérubim et Séraphim * incessábili voce proclámant:
Sanctus, * Sanctus, * Sanctus * Dóminus Deus Sábaoth.
Pleni sunt cæli et terra * maiestátis glóriæ tuæ.
Te gloriósus * Apostolórum chorus,
te Prophetárum * laudábilis númerus,
te Mártyrum candidátus * laudat exércitus.
Te per orbem terrárum * sancta confitétur Ecclésia:
Patrem * imménsæ maiestátis,
venerándum tuum verum * et únicum Fílium:
Sanctum quoque * Paráclitum Spíritum.
Tu rex glóriæ, * Christe.
Tu Patris * sempitérnus es Fílius.
Tu, ad liberándum susceptúrus hóminem, * non horruísti Vírginis uterum.
Tu, devícto mortis acúleo, * aperuísti credéntibus regna cælórum.
Tu ad déxteram Dei sedes * in glória Patris.
Iudex créderis * esse ventúrus.
Sequens versus dicitur flexis genibus.
Te ergo quæsumus, tuis fámulis súbveni, * quos pretióso sánguine redemisti.
Ætérna fac cum Sanctis tuis * in glória numerári.
Salvum fac pópulum tuum, Dómine, * et bénedic hereditáti tuæ.
Et rege eos, * et extólle illos usque in ætérnum.
Per síngulos dies * benedícimus te;
et laudámus nomen tuum in sæculum, * et in sæculum sæculi.
Dignáre, Dómine, die isto * sine peccáto nos custodire.
Miserére nostri, Dómine, * miserére nostri.
Fiat misericórdia tua, Dómine, super nos, * quemádmodum sperávimus in te.
In te, Dómine, sperávi: * non confúndar in ætérnum.
V. Benedíctus es, Dómine, Deus patrum nostrórum.
R. Et laudábilis, et gloriósus et superexaltátus in sæcula.
V. Benedicámus Patrem, et Fílium cum Sancto Spíritu.
R. Laudémus, et superexaltémus eum in sæcula.
V. Benedíctus es, Dómine, in firmaménto cæli.
R. Et laudábilis, et gloriósus et superexaltátus in sæcula.
V. Bénedic, ánima mea, Dómino.
R. Et noli oblivísci omnes retributiónes eius.
V. Dómine, exáudi oratiónem meam.
R. Et clamor meus ad te véniat.
Sacerdotes addunt:
V. Dóminus vobíscum.
R. Et cum spíritu tuo.
Orémus.
Deus, cuius misericórdiæ non est númerus, et bonitátis infinítus est thesáurus: piísimæ Maiestáti tuæ pro collátis donis grátias ágimus, tuam semper cleméntiam exorántes; ut, qui peténtibus postuláta concédis, eósdem non déserens, ad præmia futúra dispónas.
Deus, qui corda fidélium Sancti Spíritus illustratióne docuísti: da nobis in eódem Spíritu recta sápere; et de eius semper consolatióne gaudére.
Deus, qui néminem in te sperántem nímium afflígi permíttis, sed pium précibus præstas audítum: pro postulatiónibus nostris, votísque suscéptis grátias ágimus, te piísime deprecantes; ut a cunctis semper muniámur advérsis. Per Christum Dóminum nostrum.
In nómine Patris et Fílii et Spiritus Sancti.
R/. Amen.
V/. Dómine, lábia mea apéries.
R/. Et os meum annuntiábit láudem tuam.
V/. Deus, in adiutórium meum inténde.
R/. Dómine, ad adiuvándum me festína.
V/. Glória Patri...
R/. Sicut erat in princípio...
Prima decas
Ad recitationem decadis, cum in commni fit, sic proceditur: primo, omnes simul deprecationem Sanctus Deus dicunt; postea, modo consueto, a sacerdote (vel ab eo qui preces moderatur) ceterisque utraque pars orationis dominicæ alternatur; qua finita, sequentes versus nonies alternatim repetuntur, sacerdote (vel eo qui preces moderatur) Tibi laus recitante et omnibus Sanctus respondentibus; denique, espleta decade, doxologia minor Gloria Patri, ut de more, subiungitur.
Sanctus Deus, Sanctus fortis, Sanctus immortális, miserére nobis.
Pater noster.
V/. Tibi laus, Tibi glória, Tibi gratiárum áctio in sæcula sempitérna, o Beáta Trínitas!
R/.Sanctus, Sanctus, Sanctus Dóminus Deus exercítuum. Pleni sunt cæli et terra gloria tua.
V/. Glória Patri.
R/. Sicut erat.
Aliæ duæ decades eodem modo dicuntur, incipiendo a verbis Sanctus Deus, etc.
Expleta ultima decade, si in communi recitetur, ab omnibus simul dicitur sequens:
Antiphona
Te Deum Patrem ingénitum, te Fílium unigénitum, te Spíritum Sanctum Paráclitum, sanctam et indivíduam Trinitátem, toto corde et ore confitémur, laudámus atque benedícimus: Tibi glória in sæcula.
V/. Benedicámus Patrem, et Fílium cum Sancto Spíritu.
R/.Laudémus et superexaltémus eum in sæcula.
Oremus: Omnípotens sempitérne Deus, qui dedísti fámulis tuis in confessióne veræ fídei, ætérne Trinitátis glóriam agnóscere, et in poténtia maiestátis adoráre Unitátem; quæsumus, ut eiúsdem fídei firmitáte, ab ómnibus semper muniámur adversis. Per Chrístum Dóminum nóstrum.
R/. Amen.
Absoluta oratione, omnes adunt:
Líbera nos, salva nos, vivífica nos, o Beáta Trínitas!
Domine, adauge nobis fidem (Lc. 17, 5)
In te, Domine, speravi, non confundar in æternum (Ps. 20, 2)
O anima mea, ama Amorem ab æterno te amantem.
Deus, propitius esto mihi peccatori (Lc 18, 14)