Roráte, cæli, désuper, et nubes pluant iustum;

aperiátur terra, et gérminet Salvatórem.

Angelus ad Maríam ait: Invenísti grátiam apud Deum;

Ecce concípies et páries fílium,

et vocábitur Altíssimi Fílius.

Deus, qui promíssa Pátribus adímplens

beátam Vírginem Maríam elegísti,

ut matrem fíeret Salvatóris,

concéde nobis illíus exémpla sectári,

cuius humílitas tibi plácuit,

et obœdiéntia nobis prófuit.

Per Dóminum.

Accipe, Dómine, hæc múnera,

et tua virtúte in sacraméntum salútis convérte,

in quo, cessántibus figurálibus Patrum hóstiis,

verus Agnus offértur, Iesus Christus Fílius tuus,

ex intácta Vírgine ineffabíliter natus.

Qui vivit et regnat in sæcula sæculórum.

Ecce Virgo concípiet, et páriet fílium,

et vocábitur nomen eius Emmánuel.

Mystéria quæ súmpsimus, Dómine Deus noster,

misericórdiam tuam in nobis semper osténdant,

ut Fílii tui incarnatióne salvémur,

qui Genetrícis eius commemoratiónem

fidéli mente celebrámus.

Qui vivit et regnat in sæcula sæculórum.