Gaudent in cælis ánimæ Sanctórum,

qui Christi vestígia sunt secúti;

et quia pro eius amóre sánguinem suum fudérunt,

ídeo cum Christo exsúltant sine fine.

Viri sancti gloriósum sánguinem fudérunt pro Dómino,

amavérunt Christum in vita sua,

imitáti sunt eum in morte sua:

et ídeo corónas triumpháles meruérunt.

Magníficet te, Dómine,

sanctórum tuórum Cosmæ et Damiáni veneránda memória,

quia et illis glóriam sempitérnam,

et opem nobis ineffábili providéntia contulísti.

Per Dóminum.

In tuórum, Dómine, pretiósa morte iustórum,

sacrifícium illud offérimus,

de quo martýrium sumpsit omne princípium.

Per Christum.

Vos estis qui permansístis mecum in tentatiónibus meis,

et ego dispóno vobis regnum, dicit Dóminus,

ut edátis et bibátis super mensam meam in regno meo.

Ecce merces Sanctórum copiósa est apud Deum:

ipsi vero mórtui sunt pro Christo, et vivent in ætérnum.

Consérva in nobis, Dómine, munus tuum,

et quod, te donánte, pro commemoratióne

beatórum mártyrum Cosmæ et Damiáni percépimus,

salútem nobis præstet et pacem.

Per Christum.