Dóminus pars hereditátis meæ et cálicis mei:

tu es qui restítues hereditátem meam mihi (T.P. allelúia).

Dóminus sponsávit eam sibi in sempitérnum,

in fide et misericórdia (T.P. allelúia).

Largíre nobis, quæsumus, Dómine,

sapiéntiam crucis et fortitúdinem

quibus beátam Ritam ditare dignátus es,

ut, in tribulatióne cum Christo patiéntes,

pascháli eius mystério intímius participáre valeámus.

Qui tecum.

Clementíssime Deus, qui, vétere hómine consúmpto,

novum secúndum te in beáta Rita creáre dignátus es,

concéde propítius, ut nos páriter renováti

hanc placatiónis hóstiam tibi acceptábilem offerámus.

Per Christum.

Amen dico vobis quod vos, qui reliquístis ómnia,

et secúti estis me, céntuplum accipiétis,

et vitam ætérnam possidébitis (T.P. allelúia).

Pars mea Dóminus:

bonus est ánimæ quærénti illum (T.P. allelúia).

Per huius virtútem sacraménti, quæsumus, Dómine,

beátæ Ritæ exémplo, deduc nos iúgiter in tua dilectióne,

et opus bonum quod cœpísti in nobis

pérfice usque in diem Christi Iesu.

Qui vivit et regnat in sæcula sæculórum.