Intrávit Iesus in quoddam castéllum,

et múlier quædam Martha nómine

excépit illum in domum suam.

Deus, cuius Fílius

de sepúlcro ad vitam Lázarum revocávit,

et in domo Marthæ dignátus est hospitári,

da nobis, quæsumus,

ut ipsi in frátribus nostris fidéliter ministrántes,

cum María verbi eius meditatióne pasci mereámur.

Qui tecum.

In beátis tuis te, Dómine, mirábilem prædicántes,

maiestátem tuam supplíciter exorámus,

ut, sicut eórum tibi gratum éxstitit caritátis obséquium,

sic nostræ servitútis accépta reddántur offícia.

Per Christum.

Dixit Martha ad Iesum:

Tu es Christus, Fílius Dei vivi,

qui in hunc mundum venísti.

Córporis et Sánguinis Unigéniti tui sacra percéptio, Dómine,

ab ómnibus nos cadúcis rebus avértat,

ut exémplo beatórum Marthæ, Maríæ et Lázari,

valeámus et sincéra in terris caritáte profícere,

et tui perpétua in cælis visióne gaudére.

Per Christum.