In virtúte tua, Dómine, lætábitur iustus,

et super salutáre tuum exsultábit veheménter;

desidérium ánimæ eius tribuísti ei.

Deus, qui beátum Ludovícum e terréni regíminis cura

ad cæléstis regni glóriam transtulísti,

eius, quæsumus, intercessióne concéde,

ut, per múnera temporália quæ gérimus,

regnum tuum quærámus ætérnum.

Per Dóminum.

Præsénti oblatióne, Dómine,

in beáti Ludovíci commemoratióne deláta,

fidélibus tuis, quæsumus, pacis et unitátis dona largíre.

Per Christum.

Qui vult veníre post me, ábneget semetípsum,

et tollat crucem suam, et sequátur me,

dicit Dóminus.

Primum quærite regnum Dei,

et ómnia adiciéntur vobis, dicit Dóminus.

Sacraménta quæ súmpsimus, Dómine,

in commemoratióne beáti Ludovíci

mentes et corda nostra sanctíficent,

ut divínæ consórtes natúræ éffici mereámur.

Per Christum.