Múlier timens Dóminum ipsa laudábitur.

Fílii eius beatíssimam prædicavérunt,

vir eius laudávit eam.

Manum suam apéruit ínopi,

et palmas suas exténdit ad páuperem,

et panem otiósa non comédit.

Deus, mæréntium consolátor,

qui beátæ Mónicæ pias lácrimas

in conversióne fílii sui Augustíni misericórditer suscepísti,

da nobis, utriúsque intervéntu,

peccáta nostra deploráre,

et grátiæ tuæ indulgéntiam inveníre.

Per Dóminum.

Hóstias tibi, Dómine,

pro beátæ Mónicæ commemoratióne deférimus,

supplíciter deprecántes,

ut indulgéntiam nobis páriter cónferant et salútem.

Per Christum.

Símile est regnum cælórum hómini negotiatóri

quærénti bonas margarítas;

invénta autem una pretiósa margaríta,

dedit ómnia sua, et comparávit eam.

Divíni operátio sacraménti, omnípotens Deus,

in hac festivitáte beátæ Mónicæ

illúminet nos páriter et inflámmet,

ut et sanctis iúgiter desidériis ferveámus,

et bonis opéribus abundémus.

Per Christum.