Iste sanctus pro lege Dei sui certávit usque ad mortem,

et a verbis impiórum non tímuit;

fundátus enim erat supra firmam petram.

Certámen forte dedit illi Dóminus, ut víncere sciret,

quóniam ómnium poténtior est sapiéntia.

Deus, qui beátum mártyrem Vencesláum

cælésti regno terrénum postpónere docuísti,

eius précibus concéde, ut, nosmetípsos abnegántes,

tibi toto corde adhærére valeámus.

Per Dóminum.

Obláta múnera, quæsumus, Dómine,

tua benedictióne sanctífica,

quæ, te donánte, nos illa flamma tuæ dilectiónis accéndat,

per quam sanctus Vencesláus torménta sui córporis univérsa devícit.

Per Christum.

Accépta tibi sint, quæsumus, Dómine, múnera,

quæ in commemoratióne beáti mártyris tui Venceslái deférimus,

ut eo maiestáti tuæ sint plácita,

sicut illíus effúsio sánguinis apud te éxstitit pretiósa.

Per Christum.

Qui vult veníre post me, ábneget semetípsum,

et tollat crucem suam,

et sequátur me, dicit Dóminus.

Qui perdíderit ánimam suam propter me, dicit Dóminus,

invéniet eam in ætérnum.

Præstent nobis, quæsumus, Dómine,

sacra mystéria quæ súmpsimus

eam ánimi fortitúdinem,

quæ beátum Vencesláum mártyrem tuum

réddidit in tuo servítio fidélem et in passióne victórem.

Per Christum.