Visitábo oves meas, dicit Dóminus,

et suscitábo pastórem qui pascat eas:

ego autem Dóminus ero eis in Deum.

Iste est fidélis et prudens dispensátor,

quem constítuit Dóminus super famíliam suam,

ut det illis in témpore trítici mensúram.

Custódi, quæsumus, Dómine, in pópulo tuo spíritum,

quo beátum Cárolum epíscopum implevísti,

ut Ecclésia indesinénter renovétur,

et, Christi se imágini confórmans,

ipsíus vultum mundo váleat osténdere.

Qui tecum.

Inténde múnera, Dómine,

altáribus tuis pro beáti Cároli commemoratióne propósita,

et huius sacrifícii virtúte concéde,

ut, sicut illum pastorális offícii vigilántia

et præcláris virtútum méritis sublimásti,

ita nos fácias sincéris óperum frúctibus abundáre.

Per Christum.

Non vos me elegístis, dicit Dóminus;

sed ego elégi vos, et pósui vos ut eátis et fructum afferátis,

et fructus vester máneat.

Beátus ille servus, quem, cum vénerit dóminus eius,

et pulsáverit iánuam, invénerit vigilántem.

Præstent nobis, quæsumus, Dómine,

sacra mystéria quæ súmpsimus

eam ánimi fortitúdinem,

quæ beátum Cárolum réddidit in ministério fidélem

et in caritáte fervéntem.

Per Christum.