Dóminus pars hereditátis meæ et cálicis mei:

tu es qui restítues hereditátem meam mihi.

Dóminus sponsávit eam sibi in sempitérnum,

in fide et misericórdia.

Deus, qui beátam Ioánnam Francíscam

per várias vitæ sémitas præcláris méritis illustrásti,

ipsíus nobis intercessióne concéde,

ut, in vocatióne nostra fidéliter ambulántes,

lucis exémpla iúgiter ostendámus.

Per Dóminum.

Clementíssime Deus, qui, vétere hómine consúmpto,

novum secúndum te in beáta Ioánna Francísca creáre dignátus es,

concéde propítius, ut nos páriter renováti

hanc placatiónis hóstiam tibi acceptábilem offerámus.

Per Christum.

Amen dico vobis quod vos, qui reliquístis ómnia,

et secúti estis me, céntuplum accipiétis,

et vitam ætérnam possidébitis.

Pars mea Dóminus:

bonus est ánimæ quærénti illum.

Per huius virtútem sacraménti, quæsumus, Dómine,

beátæ Ioánnæ Francíscæ exémplo, deduc nos iúgiter in tua dilectióne,

et opus bonum quod cœpísti in nobis

pérfice usque in diem Christi Iesu.

Qui vivit et regnat in sæcula sæculórum.