Replévit beátum Bernárdum Dóminus spíritu intellegéntiæ,

et ipse fluénta doctrínæ ministrávit pópulo Dei.

Deus, qui beátum Bernárdum abbátem,

zelo domus tuæ succénsum,

in Ecclésia tua lucére simul et ardére fecísti,

eius nobis intercessióne concéde,

ut, eódem spíritu fervéntes,

tamquam fílii lucis iúgiter ambulémus.

Per Dóminum.

Maiestáti tuæ, Dómine,

unitátis et pacis offérimus sacraméntum,

sancti Bernárdi abbátis memóriam recoléntes,

qui, verbo et ópere præclárus,

Ecclésiæ tuæ órdinis concórdiam strénue procurávit.

Per Christum.

Sicut diléxit me Pater, et ego diléxi vos, dicit Dóminus;

manéte in dilectióne mea.

Cibus, quem súmpsimus, Dómine,

in celebratióne beáti Bernárdi,

suum in nobis operétur efféctum,

ut, eius exémplis roboráti et mónitis erudíti,

Verbi tui incarnáti rapiámur amóre.

Qui vivit et regnat in sæcula sæculórum.