Constítues eos príncipes super omnem terram;

mémores erunt nóminis tui

in omni generatióne et generatiónem:

proptérea pópuli confitebúntur tibi in ætérnum

et in sæculum sæculi.

Ecclésiam tuam, Dómine,

apostólicis defénde præsídiis,

ut, per quos inítium divínæ cognitiónis accépit,

per eos usque in finem sæculi

cápiat grátiæ cæléstis augméntum.

Per Dóminum.

Servitútis nostræ tibi, Dómine, munus offeréntes,

tuam deprecámur cleméntiam,

ut trádita nobis apostolórum Petri et Pauli ministério véritas

in córdibus nostris illibáta persevéret.

Per Christum.

Dómine, verba vitæ ætérnæ habes,

et nos credídimus quia tu es Christus Fílius Dei.

Pópulus tuus, quæsumus, Dómine, cælésti pane reféctus,

apostolórum Petri et Pauli commemoratióne lætétur,

quorum donásti patrocínio gubernári.

Per Christum.