Iste sanctus pro lege Dei sui certávit usque ad mortem,

et a verbis impiórum non tímuit;

fundátus enim erat supra firmam petram.

Certámen forte dedit illi Dóminus, ut víncere sciret,

quóniam ómnium poténtior est sapiéntia.

Præsta nobis, quæsumus, Dómine, spíritum fortitúdinis,

ut, glorióso exémplo beáti Sebastiáni mártyris tui edócti,

tibi magis quam homínibus obœdíre discámus.

Per Dóminum.

Obláta múnera, quæsumus, Dómine,

tua benedictióne sanctífica,

quæ, te donánte, nos illa flamma tuæ dilectiónis accéndat,

per quam sanctus Sebastiánius torménta sui córporis univérsa devícit.

Per Christum.

Accépta tibi sint, quæsumus, Dómine, múnera,

quæ in commemoratióne beáti mártyris tui Sebastiani deférimus,

ut eo maiestáti tuæ sint plácita,

sicut illíus effúsio sánguinis apud te éxstitit pretiósa.

Per Christum.

Qui vult veníre post me, ábneget semetípsum,

et tollat crucem suam,

et sequátur me, dicit Dóminus.

Qui perdíderit ánimam suam propter me, dicit Dóminus,

invéniet eam in ætérnum.

Præstent nobis, quæsumus, Dómine,

sacra mystéria quæ súmpsimus

eam ánimi fortitúdinem,

quæ beátum Sebastianum mártyrem tuum

réddidit in tuo servítio fidélem et in passióne victórem.

Per Christum.