Iste sanctus pro lege Dei sui certávit usque ad mortem,

et a verbis impiórum non tímuit;

fundátus enim erat supra firmam petram.

Certámen forte dedit illi Dóminus, ut víncere sciret,

quóniam ómnium poténtior est sapiéntia.

Omnípotens sempitérne Deus,

tuum in nobis Spíritum cleménter infúnde,

ut corda nostra ea dilectióne válida potiántur,

per quam sanctus martyr Vincéntius

ómnia córporis torménta devícit. Per Dóminum.

Obláta múnera, quæsumus, Dómine,

tua benedictióne sanctífica,

quæ, te donánte, nos illa flamma tuæ dilectiónis accéndat,

per quam sanctus Vincentius torménta sui córporis univérsa devícit.

Per Christum.

Accépta tibi sint, quæsumus, Dómine, múnera,

quæ in commemoratióne beáti mártyris tui Vincentii deférimus,

ut eo maiestáti tuæ sint plácita,

sicut illíus effúsio sánguinis apud te éxstitit pretiósa.

Per Christum.

Qui vult veníre post me, ábneget semetípsum,

et tollat crucem suam,

et sequátur me, dicit Dóminus.

Qui perdíderit ánimam suam propter me, dicit Dóminus,

invéniet eam in ætérnum.

Præstent nobis, quæsumus, Dómine,

sacra mystéria quæ súmpsimus

eam ánimi fortitúdinem,

quæ beátum Vincentium mártyrem tuum

réddidit in tuo servítio fidélem et in passióne victórem.

Per Christum.