In virtúte tua, Dómine, lætábitur iustus,

et super salutáre tuum exsultábit veheménter;

desidérium ánimæ eius tribuísti ei.

Deus omnípotens, cui servíre regnáre est,

concéde nobis, beáti Casimíri intercedénte suffrágio,

tibi in sanctitáte et iustítia perpétuo famulári.

Per Dóminum.

Præsénti oblatióne, Dómine,

in beáti Casimiri commemoratióne deláta,

fidélibus tuis, quæsumus, pacis et unitátis dona largíre.

Per Christum.

Qui vult veníre post me, ábneget semetípsum,

et tollat crucem suam, et sequátur me,

dicit Dóminus.

Primum quærite regnum Dei,

et ómnia adiciéntur vobis, dicit Dóminus.

Sacraménta quæ súmpsimus, Dómine,

in commemoratióne beáti Casimiri

mentes et corda nostra sanctíficent,

ut divínæ consórtes natúræ éffici mereámur.

Per Christum.