Cáritas Dei diffúsa est in córdibus nostris,

per inhabitántem Spíritum eius in nobis (T.P. allelúia).

Deus, qui fidéles tibi servos

sanctitátis glória sublimáre non desístis,

concéde propítius,

ut illo nos igne Spíritus Sanctus inflámmet,

quo beáti Philíppi cor mirabíliter penetrávit.

Per Dóminum.

Hóstiam tibi laudis offeréntes, quæsumus, Dómine,

ut, beáti Philíppi exémplo,

ad tui nóminis glóriam proximíque servítium

hílares nos semper præstémus.

Per Christum.

Sicut diléxit me Pater,

et ego diléxi vos, dicit Dóminus;

manéte in dilectióne mea (T.P. allelúia).

Cæléstibus, Dómine, pasti delíciis,

quæsumus, ut, beáti Philíppi imitatióne,

semper éadem, per quæ veráciter vívimus, appetámus.

Per Christum.