Státuit ei Dóminus testaméntum pacis,

et príncipem fecit eum,

ut sit illi sacerdótii dígnitas in ætérnum.

Deus, qui advérsus Ecclésiam tuam,

in apostólicæ petræ soliditáte fundátam,

portas ínferi numquam prævalére permíttis,

da ei, quæsumus, ut, intercedénte beáto Leóne papa,

in tua veritáte consístens, pace contínua muniátur.

Per Dóminum.

Oblátis munéribus, quæsumus, Dómine,

Ecclésiam tuam benígnus illúmina,

ut et gregis tui profíciat ubíque succéssus,

et grati fiant nómini tuo, te gubernánte, pastóres.

Per Christum.

Dixit Petrus ad Iesum:

Tu es Christus, Fílius Dei vivi.

Respóndit Iesus: Tu es Petrus,

et super hanc petram ædificábo Ecclésiam meam.

Refectióne sancta enutrítam

gubérna, quæsumus, Dómine, tuam placátus Ecclésiam,

ut, poténti moderatióne dirécta,

et increménta libertátis accípiat,

et in religiónis integritáte persístat.

Per Christum.