Propter testaméntum Dómini et leges patérnas,

Sancti Dei perstitérunt in amore fratérnitatis:

Quia unus fuit semper spíritus in eis, et una fides.

Excita, quæsumus, Dómine, in Ecclésia tua Spíritum,

quo replétus beátus Iósaphat

ánimam suam pro óvibus pósuit,

ut, eo intercedénte, nos quoque eódem Spíritu roboráti,

ánimam nostram pro frátribus pónere non vereámur.

Per Dóminum.

Clementíssime Deus,

múnera hæc tua benedictióne perfúnde,

et nos in tua fide confírma,

quam sanctus Iósaphat effúso sánguine asséruit.

Per Christum.

Qui perdíderit ánimam suam propter me,

dicit Dóminus,

invéniet eam in ætérnum.

Spíritum, Dómine, fortitúdinis et pacis

hæc nobis tríbuat mensa cæléstis,

ut, sancti Iósaphat exémplo,

vitam nostram

ad honórem et unitátem Ecclésiæ libénter impendámus.

Per Christum.