Iustus ut palma florébit,

sicut cedrus Líbani multiplicábitur,

plantátus in domo Dómini, in átriis domus Dei nostri.

Deus, qui beáto António abbáti tribuísti

mira tibi in desérto conversatióne servíre,

eius nobis interventióne concéde,

ut, abnegántes nosmetípsos,

te iúgiter super ómnia diligámus.

Per Dóminum.

Accépta tibi sint, Dómine, quæsumus,

múnera nostræ servitútis,

pro beáti Antónii commemoratióne altári tuo propósita,

et concéde, ut, a terrénis impediméntis absolúti,

te solo dívites efficiámur.

Per Christum.

Si vis perféctus esse,

vade, vende quæ habes,

et da paupéribus, et séquere me,

dicit Dóminus.

Sacraméntis tuis, Dómine,

salúbriter enutrítos,

cunctas fac nos semper insídias inimíci superáre,

qui beáto António dedísti

contra potestátes tenebrárum claras reférre victórias.

Per Christum.