Annuntiáte inter gentes glóriam eius,

in ómnibus pópulis mirabília eius,

quóniam magnus Dóminus et laudábilis nimis.

Deus, qui beátos Timótheum et Titum

apostólicis virtútibus decorásti,

utriúsque intercessióne concéde,

ut, iuste et pie vivéntes in hoc sæculo,

ad cæléstem mereámur pátriam perveníre.

Per Dóminum.

Súscipe, quæsumus, Dómine, múnera pópuli tui,

pro beatórum tuórum Timóthei et Titi festivitáte deláta,

et sincéro nos corde pérfice benígnus accéptos.

Per Christum.

Eúntes in mundum univérsum, prædicáte Evangélium:

ego vobíscum sum ómnibus diébus, dicit Dóminus.

Sacraménta quæ súmpsimus, Dómine Deus noster,

illam nobis fidem innútriant,

quam et apostólica dócuit prædicátio,

et beatórum Timóthei et Titi sollicitúdo custodívit.

Per Christum.