In médio Ecclésiæ apéruit os eius,

et implévit eum Dóminus spíritu sapiéntiæ et intelléctus;

stolam glóriæ índuit eum (T.P. allelúia).

Os iusti meditábitur sapiéntiam,

et lingua eius loquétur iudícium;

lex Dei eius in corde ipsíus (T.P. allelúia).

Córdibus nostris, quæsumus, Dómine,

Spíritum Sanctum benígnus infúnde,

cuius afflátu beátus Ephræm diáconus

in tuis mystériis decantándis exsultávit,

eiúsque virtúte tibi soli desérviit.

Per Dóminum.

Sacrifícium tibi pláceat, Deus,

in festivitáte beáti Ephræm libénter exhíbitum,

quo monénte, nos étiam totos tibi réddimus collaudántes.

Per Christum.

Fidélis servus et prudens,

quem constítuit Dóminus super famíliam suam,

ut det illis in témpore trítici mensúram (T.P. allelúia).

Qui meditábitur in lege Dómini die ac nocte,

dabit fructum suum in témpore suo (T.P. allelúia).

Quos Christo réficis pane vivo,

eósdem édoce, Dómine, Christo magístro,

ut in festivitáte beáti Ephræm tuam discant veritátem,

et eam in caritáte operéntur.

Per Christum.