Elégit eum Dóminus sibi in sacerdótem magnum,

et apériens thesáurum suum

abundáre eum fecit ómnibus bonis.

Ecce sacérdos magnus,

qui in diébus suis plácuit Deo:

ídeo iure iurándo fecit illum Dóminus créscere

in plebem suam.

Deus, qui, ad tuéndam cathólicam fidem

et univérsa in Christo instauránda, beátum Pium papam

cælésti sapiéntia et apostólica fortitúdine replevísti,

concéde propítius, ut, eius institúta et exémpla sectántes,

præmia consequámur ætérna.

Per Dóminum.

Oblatiónibus nostris, Dómine, benígne suscéptis,

da, quæsumus, ut hæc divína mystéria,

beáti Pii papæ mónita secúti,

sincéris tractémus obséquiis, et fidéli mente sumámus.

Per Christum.

Pastor bonus ánimam suam pósuit

pro óvibus suis.

Memóriam beáti Pii papæ celebrántes,

quæsumus, Dómine Deus noster,

ut, virtúte mensæ cæléstis,

constántes efficiámur in fide,

et in tua simus caritáte concórdes.

Per Christum.