Ave, María, grátia plena, Dóminus tecum:

benedícta tu in muliéribus, et benedíctus fructus ventris tui.

Grátiam tuam, quæsumus, Dómine,

méntibus nostris infúnde,

ut, qui, Angelo nuntiánte,

Christi Fílii tui incarnatiónem cognóvimus,

beáta María Vírgine intercedénte,

per passiónem eius et crucem

ad resurrectiónis glóriam perducámur.

Per Dóminum.

Fac nos, quæsumus, Dómine,

his munéribus oblátis conveniénter aptári,

et Unigéniti tui mystéria ita recólere,

ut eius digni promissiónibus éffici mereámur.

Qui vivit et regnat in sæcula sæculórum.

Ecce concípies in útero, et páries fílium,

et vocábis nomen eius Iesum.

Quæsumus, Dómine Deus noster,

ut, qui in hoc sacraménto

Fílii tui mortem et resurrectiónem annuntiámus,

eius sócii passiónum effécti,

consolatiónis étiam ac glóriæ mereámur esse partícipes.

Per Christum.